Inkapasidade FRETILIN iha Tratadu Tasi Timor, Difikulta Dada Kadoras mai Timor-Leste

Maske Limitasaun Governo AMP Sei Esforsa Nafatin

Jornal Libertasaun - Kuarta, 12 Janeiru 2012

Jornalista, Zelia X.

Sekretariu Estadu Rekursu Naturais (SERN) Alfredo Pires, hate katak, governu atual seidauk konsege lori kadoras greater sunrise tanba governo FRETILIN uluk mak halo salah, assina Tratado Tasi Timor nebe fo liu prioridade ba Australia kontrola ita nia riku soi.

Alfredo dehan, durante kaer ukun Governu Aliansa Maioria Parlamentar konsege hatudu sinal pozitivu iha areas oin-oin iha dezenvolvimento minarai, maske seidauk lori kadoras Greater sunrise mai Timor leste.

“Ita seidauk remata, maibe ho ida neé mos laiha problema, ita nia interese nasional, Governu mai fali (governu foun) sei kontinua prosesu ida ne’e,” dehan SERN ba Independente iha Parlamentu Nasional horsehik.

Nia mos rekoinese katak, atu realiza mehi né, laos atu hakilar deit hanesan deputado balun iha Fretilin hakilar mamuk deit, maibe tenki bazeia ba número no estudu, negosiante tenki lori tempo naruk mak halo laos tempo badak.

“Ita hakarak halo lalais maibé tempo mak limita ita, importante mak ita tenki kaer interese nasional,” dehan Alfredo.

Deputadu husi bancada FRETILIN Jose Teixeira dehan, tratadu greater sunrise nebé uluk governu anterior asina loke dalan ba negosiasaun, maibe governu atual (GAP) mak laiha kapasidade atu halo negosiasaun hodi lori kadoras mai Timor leste.

“Ne’e komentariu SERN Alfredo, La los no hatudu katak sira maka failla, agora sira soe sala ba ema seluk,” Teixeira dehan.

José Teixeira nebé uluk kaer pasta nudar sekretario rekursus naturais iha governu Fretilin nebé gagal total iha negosiasaun Timor Gap, no kuaze entrega tomak ita nia riku soin ba Australia, hosik Australia kontrola ita nia fronteira tasi Timor tomak no besik hadau ita nia explorasaun mina Timor tomak, agora ibun komesa bot hodi ataka fali governo né.

Relasiona ho akordu greater sunrise nebé maka sei remata iha 2013, Alfredo dehan, Australia ho Timor Leste bele deside hodi hakotu tratadu né bazeia ba buat nebe hateten iha akordu laran.

Durante né governo AMP iha difikuldade atu lori kadoras mai Timor-Leste tanba falhansu governu FRETILIN nian nebé entrega tiha fronteira Timor nian ba Australia, no lakohi negosia to tinan limanulu (50). Ida né fo fatin ba Australia atu domina ita nia minarai, no sente sira iha poder liu atu deside tuir sira nia hakarak.

Falhansu ida né mak durante né limita hela kapasidade governo AMP atu bele obriga dada kadoras mai Timor, maske Australia rasik liu hosi Woodside aceita ona ho governo CNRT nia hakarak (gos).

TV one Sei Fo Sai Pakote Espesial Primeiru Konferensia Nasional CNRT Nia

Thursday, 12 January 2012 15:07

Written by Domingos da Silva

DILI MLP, TV one sei fo sai pakote especial Primeiru Konferensia Nasional Partidu Kongresu Nasional Rekontruksaun Timor Leste-CNRT nian durante oras rua nia laran.

Publikasaun ne’e sei fo sai iha loron domingu 15 Janeuro 2012, oras 17:00-19:00 WIB (19:00-21:00 OTL) nian, tanba ne’e husu ba Kuadrus Politiku, Militante no simpatizante Partidu CNRT nian atu Akompania Pakote Espesial ne’e.

Iha pakote especial ne’e mos sei fo sai Intervista Exlusivu TV one ho Prezidente Partidu CNRT Kay Rala Xanana Gusmaõ.

http://www.partidocnrt.com/

“Dom Basilio: Lideransa Partidu Politiku Tenki Hametin Paz No Estabilidade”, CNRT Afirma liu husi Kodigo de Konduta

.

Notisia Husi TVTL - Segunda Kalan, 09 Janeiru 2011

Bispo Dioseze Baucau Dom Basilio do Nascimento husu ba lider Partidus Politikus atu hatudu matoridade politika hodi maten Paz no Estabilidade iha Timor Leste.

Dom Basilio do Nascimento hateten lia hirak ne’e ba Jornalista RTTL foin lalais iha Vemase wainhira analiza situasaun jeral kona ba estabilidade nasional iha natal no tinan foun ne’ebe lao diak, tamba ne’e Dom Basilio kontinua husu ba lider Politiku sira atu hatudu matenek hodi kontribui ba paz iha nasaun ida ne’e.

“Tempo ne’e ita halo avaliasaun ida kona ba ita nia tinan 10 ne’e, ita hetek ba kotuk, ohin buat kalma, ita hein katak buat ne’e kalma beibeik, hau husu ba politiku sira atu modera sira nia reuniaun balun, hau haree partidu sira iha konsensia katak, it abele hanoin oin selukba, maibe buat ida demokrasia ne’e ita nia regra,” dehan dom Basilio.

Iha oportunidade ne’e, Bispo Dom Basilio haktuir liu tan katak, akontese pasadu sai hanesan reflesaun ba ema hotu atu hari pas hodi moris iha establilidade nia laran.

 

Entertantu Partidu CNRT nebe Lidera husi Maun Bo'ot Kayrala Xanana Gusmao, liu husi Konferensia Nasional foin dadaun ne'e iha Centro Convencao Dili, Hola ona pozisaun importante ida mak Hakesi Militantes no Simpatizantes sira ho Kodigo de Konduta ba Eleisaun nian. Kodigo de Konduta ida ne'e importante atu hametin Estabilidade no Paz molok no hafoin de Eleisaun.

 

Tuir Koordenador Partidu Distritu Lospalos katak, kodigo de konduta ida ne'e importante, tamba bele orienta militantes sira para hakmatek no simu resultadu eleisaun. laos hanesan fali partidu seluk, kuandu lakon, ba estraga sasan, sunu ema nia uma no buat seluk tan, nia haktuir.

 

 

CNRT Nia Programa Hari Uma 5 Kada Aldeia

Posting Husi : Josefa Parada
 DILI—Komisaun Politika Nasional (KPN), liu husi nia Partidu CNRT, sei lori programa partidu ne’ebe promote ona ba povu katak, sei hari uma 5 kada Aldeia tomak iha teritoriu Timor laran tomak.

Tuir, Membru KPN, CNRT, Janurio Pereira, liu husi konferensia imprensa, Domingu (8/1), iha Centru Konvensaun Dili,  katak iha eleisaun jeral 2012, sira sei lori programa partidu ba iha baze, programa principal maka sei hari uma lima iha kada Aldeia.
Mesmu seidauk tama iha kampaina presidensial no parlamentar, maibe programa atu hari uma lima kada Aldea komesa implementa ona. Espera katak iha eleisaun jeral 2012, bainhira povu fo fiar ba CNRT hodi kaer governu maka sira sei halo dezenvolvementu diak liu ba iha povu no nasaun ida ne’e.
Iha oportunidade ida membru Delegadu CNRT, husi Distritu Viqueque, Marcelina hatete, sira buka oinsa atu esplika programa partiidu CNRT nia iha baze.
Nia iha esperansa katak iha Distritu Viqueque, povu barak sei fo fiar ba iha partidu CNRT, ne’ebe lidera husi Kay Rala Xanana Gusmao hanesan Presidente. Informasaun kompletu iha STL Jornal no STL web, edisaun Tersa (10/1). Oscar Salsinha

Dionisio Babo; CNRT Sei Apoiu Kandidatu Independente

CJITL - Domingu, 8 husi Janeiru 2012

KonferensiaNasional partidu Conselhu Nasional Rekonstrusaun de Timor – CNRT ne'ebe halo durante loron rua iha Dili (7-8/1) konsege remata ho diak no eskolha tiha ona fo apoiu ba kandidatu independente ba eleisaun Prezidensial nian iha Marcu.

Dionisio Babo, Sekretario Jeral ba jornalista hafoin konferensia loron rua ne'e konfirma katak CNRT sei fo fiar ba kandidatu independente hodi nune'e bele garante unidade no hakuak povu tomak.

"CNRT sei fo apoiu ba kandidatu independente, no antes ne'e la involve iha partidu ruma, atu nune'e bele hakoa'k povu" Babo reafirma.

Maske nune'e tuir Babo, desizaun se mak sei hetan konfiansa partidu nian seidauk bele anunsia tamba prezidente atual rasik seidauk deklara loron eleisaun nian.

Oras ne'e dadaun Timor Leste iha ona kandidatu independente na'in rua hanesan Taur Matan Ruak, Eis Komandante Falintil Forsa Defeza Timor Leste F-FDTL no mos Rogerio Tiago Lobato, Membru Ativu Commite Central Fretilin - CCF.

Konferensia ne'ebe hala'o iha Centru Convensaun Dili – CCD ne'e hetan partisipasaun husi militantes hamutuk na'in 496 husi distritu 13 iha Timor laran tomak.

Xanana Gusmao, Prezidente CNRT iha loron ikus kongresu nian husu ba dirijente partidu tomak atu servisu makas hodi garante votus maioria iha eleisaun jeral no husu atu hametin dame no hado'ok violensia iha atinji objektivu ne'e.

Konferensia ne'e rasik halo diskusaun ba programas partidu ba tinan lima nian inklui mos planu estratejika atu manan iha eleisaun jeral ne'ebe atu mai dadaun. (Amandio Magno/CJITL)

.

CNRT Garantia Manan Absoluta Iha Elisaun

Posting Husi : Josefa Parada
DILI- Sekretariu Jeral Partidu Conselho Nasional Reconstrusaun Timor Leste (CNRT), Deonisio Babo garantia katak iha Elisaun Parlamentar mai sei manan mutlak.

Sekjer Deonisio hateten tuir dadus husi CNRT nian hatudu katak iha konfiansa makas sei manan maioria absoluta iha eleisaun.
Katak Babo alende ida ne'e movimentu politika lao normal no kosolidasaun partidu komesa hato ona programa Governu tinan 5 mai sekuandu CNRT povu fiar atu kaer ukun.
"Progarama Governu tinan 5 mai, ami elabora liu tan no depois konferensia ami sei hato ba povu ida ne'e maka CNRT hakarak halo iha 2012-2017 tamba ne'e tenki vota ba CNRT," hatete Deonisio ba Jornalista hafoin deriji Enkontru Semestral Conselho Diresaun Nasional (CDN), iha Salaun Xanana Sport Center Dili, Sesta (06/01).
Konfiansa ne’e mos mai husi Deputadu bankada CNRT, Araõ Noe, katak, Partidu Congresu Nasional Rekontrusaun Timor  ( CNRT)  fiar an bele manan iha elisaun jeral 2012.
Entretantu iha parte seluk Deputadu  bankada Fretilin, Inacio Morreira hateten, Ho prestasaun servisu governu Aliansa Maioria Parlamentar (AMP)  durante tinan haat  nee,  ambisaun lideransa partidu CNRT nian atu ukun mesak iha 2012 sei sai hanesan mehi deit. Informasaun kompletu iha STL Jornal no STL web, edisaun Sabado (7/1). Terezinha da Costa

PD-Frenti Mudansa no Fretilin Hato’o Parabens Ba CNRT

DILI – MLP, Partidu Demokratiku, Frenti Mudansa no partidu historiku, Frente Revolusionariu Timor Leste indenpendensia(fretilin) hato`o parabens no susesu ba partidu Congresu Nasional De Rekontruksaun De Timor Leste (CNRT) ne`ebe halo Konferensia Nasional Partidu CNRT nian iha Centru Convensaun Dili( eis Merkado Lama).

Tuir José Luis Guterres hosi Partidu Frenti Mudansa ba STL iha Merkado lama Sábadu (07/01) hateten, nia parte lori partidu nia naran hato`o susesu bot ba Partidu CNRT no nia militante tomak.

“Susesu bot ba partidu CNRT no nia militante sira  hotu liu-liu ba komprimisu ne’ebe sira tatoli katak sira hakarak kontribui ba paz no estabilidade ne’ebe hau laran kontente tebes tanba partidu ida nebe lidera hosi maun bot Xanana iha komprimisu bot atu hametin demokrasia, liberdade nomos transparensia ba prosesu elisaun nebe atu mai iha oin ne ne eventu ida diak ba ita tomak”, hateten Jose Luis. Iha fatin hanesan sekretariu jeral Partidu Demokratiku(PD), Mariano Assanami Sabino, mos hateten, fo parabens ba CNRT no hein katak nia rejultadu lao diak.

“Iha rekontrusaun estadu foun konstrui mos partidu sira ne’ebe maka hametin liu tan sira nia programa konsolida sira nia estrutura ida ne’e importante tebes iha pais foun ida ne’e tanba ne’e maka ami fo parabens, hein katak nia rezultadu lao diak no susesu ba konferensia partidu CNRT”, dehan Asanami.

Nune’e mos ho prezidente partidu FRETILIN, Fransisco Guterres “Lu Olo”, hateten, nia parte lori partinu nia naran hato’o agradese tebes ba konvite ne’ebe CNRT fo ba sira.

“Konferensia ida ne’e importante tebes ba partidu CNRT nian no permeiru hau hakarak hato’o agradese ba konvite ne’ebe maka partidu CNRT fo mai ami atu partisipa iha konferensia ida ne’e  no hau sente ida ne’e onra bot teb-tebes, no lori ami nia partidu nia naran ami hotu fo agradesementu  bot teb-tebes ba konvite ne’ebe maka CNRT fo mai ami atu tuir konferensia ida ne’e no hau hanoin hanesan partidu hotu-hotu hanesan partidu CNRT perpara ona atu avansa ba elisaun presidensiais no parlamentar”, komenta Lu Olo.

Tuir observasaun STL, nomos MLP, maioria lideransa partidu politiku tomak no nia membru balu ne’ebe eziste iha nasaun foun ida ne’e partisipa hotu iha kongresu partidu CNRT nian.

http://www.partidocnrt.com/index.php?option=com_content&view=article&id=967:pd-frenti-mudansa-no-fretilin-hatoo-parabens-ba-cnrt&catid=29:notisia-cnrt&Itemid=154