Tuir dinamika diskusaun ba asuntu Probabilidade Koligasaun hetan diskusaun makas kuase oras rua resin. Dala uluk Komisaun D nebe trata asuntu Probabilidade Koligasaun apresenta kriteria oinsa halo koligasaun, ikus mai diskusaun sai manas tamba, balun foka kriteria, barak liu esperesa sira nia sentimentu konaba desvantazen husi esperiensia koligasaun durante tinan 5 iha AMP.
Kuase partisipantes sira husi Distritu espresa sira nia sentimentu triste nebe sira rasik hasoru iha base katak, laos membro partidu husi Ministeriu A, nia labele asesu buat nebe governo iha, ho liafuan seluk koligasaun ne’e resulta deit sentimentu tristeza ba ami nudar kuadru iha partidu, tamba ita hola parte ba koligasaun mais realidade fo benefisiu fali ba partidu seluk atu aproveita deit koligasaun ho CNRT hodi habo’ot an.
Tuir konferensista ida husi Distritu Baucau hateten katak, Dezenvolvimentu lao duni iha periode AMP nian, maibe dezenvolvimentu ida nebe ita bele dehan katak lao neneik tebes tamba interese partidu idak-idak nian iha koligasaun makas liu duke visaun nebe ita hakarak ba Dezenvolvimentu Nasional.
Hafoin intervensaun sira husi konferensista sira, presidente do Partidu Kayrala Xanana Gusmao halo resumu no apresenta ba konferensista sira atu aprova kriteria ba koligasaun nian. Kriteria importante liu mak so resultadu eleisoens mak sei determina se partidu sei opta ka la opta koligasaun no se hakarak tama koligasaun ho CNRT tenke simu PEDN no tuir programa partidu CNRT nian.
Ikus mai konferensista ho antusiasmo makas hato’o sira nia basa liman, hodi kontinua serbisu ba partidu hodi hetan targetu P-45+ nebe sai hanesan meta partidu nian hodi hases an tiha probabilidade ba koligasaun ne’e. (JC)
Tidak ada komentar:
Posting Komentar