Sorumutu Konsellu Ministru loron 27 fulan Jullu tinan 2011

IV GOVERNU KONSTITUSIONÁL

SEKRETARIA ESTADU KONSELLU MINISTRU

...............................................................................................................................................

KOMUNIKADU BA IMPRENSA

Sorumutu Konsellu Ministru nian loron 27, fulan Jullu 2011

Konsellu Ministru hala’o Sorumutu, iha kuarta-feira ida ne’e, loron 27, fulan Jullu 2011, iha Sala Sorumutu Konsellu Ministru nian, iha Palásiu Governu, iha Díli, no aprova ona:

1. Dekretu Lei ne’ebé kria Komisaun Nasionál Desportu
Sekretáriu Estadu Desportu defini tiha ona Lei Baze sira ba Desportu no Komisaun Nasionál Desportu nian. Nune’e Dekretu Lei ne’e regula no delimita ninia kompeténsia, kompozisaun no funsionamentu hodi fó kontinuidade ba prosesu dezenvolvimentu prátika desportiva nian iha Timor-Leste.
Komisaun Nasionál Desportu nian hala’o funsaun fiskalizadora, ba rezolusaun litíjiu administrasaun no dezenvolvimentu desportu nian, ba promosaun saúde desportista sira nian, promosaun voluntariadu ba desportu i organizasaun no kordenasaun ba asaun kombate hasoru hemu aimoruk bainhira hala’o desportu, violénsia iha desportu no dezviu sira seluk sistema desportivu nian.

Konsellu Ministru analiza mós:

1. Dekretu-Lei ne’ebé  mak aprova Regulamentu Disiplina PNTL nian
Konsellu Ministru analiza ona nesesidade atu altera Regulamentu Disiplina PNTL nian hodi korrije impresizaun balun, hanesan mós esplikasaun ba konseitu, hodi  ajusta konseitu sira ne’e ba lian tetun. Nia objetivu atu fó rezultadu ne’ebé diak ba interpretasaun no aplikasaun  ba Regulamentu ne’e.

2. Dekretu-Lei  ne’ebé  aprova  Rejimentu  ba Emolumentu  Rejistu  no  Notariadu
Ministériu  Justisa  aprezenta  tiha  Rejimentu  Emolumentu  Rejistu  no  Notariadu  ne’ebé  estabelese  regra  aplikável ba  setór   oioin   iha  rejistu  no  notariadu sira, tamba  taxa  sira  hanesan  obrigasaun  ida  husi  servisu   ne’ebé  Estadu  halo ba utente  benefísiáriu sira.

3. Dekretu-Lei  kona-bá  Ospitál  Servisu  Nasionál  Saúde  sira
Ministru  Saúde  aprezenta  tiha  proposta  Dekretu-Lei ida  ne’ebé  hakarak  atu  estabelese  sistema   servisu  públiku  ospitlár  ida artikuladu no funsionál,  ne’ebé  mak efisiente  no  fó rezultadu.  Dekretu-Lei  ne’e  tenki  asegura,  la’ós  de’it  ba  ohin  loron  maibé  mós  ba  aban-bainrua,  nível  prestasaun  servisu  ospitalár ida  diak   no  nia  dezenvolvimentu.

4.  Planu Tranzisaun Nasoins Unidas
Konsellu  Ministru  iha  mós  oportunidade  atu  hahú halo  diskusaun  kona-bá  Planu  Tranzisaun  Nasoins  Unidas   nian.


http://timor-leste.gov.tl/?p=5418&lang=tp