Josefa Parada - Tersa, 14 Junhu 2011 - SUARA TIMOR LOROSAE
DILI –Relasiona ho preokupasaun ne’ebe Permeiru Ministru (PM) Xanana Gusmao temi bebeik, katak governu ne’e nakonu ho koruptor ou ministru sira matan naklosu ho osan alias “ naok ten”, tuir Eis Vise Ministru Asuntu Administrasaun hateten, Xanana Gusmao laos ema ne’ebe koruptor maibe ninia ministru balu mak halo koruptor iha governu AMP nia laran.
“Hau atu dehan katak, PM Xanana Gusmao laos ema ne’ebe koruptor maibe iha ninia Ministru balu mak halo koruptor ou naok povu nia osan hodi estraga governu ida ne’ebe nia (PM Xanana) lidera, no uluk hau dehan ona ou fo hatene ona Xanana, maibe nia la fiar agora ikus mai foin mak rekuinese katak, governu AMP iha duni koruptor”, dehan Mario Carascalao, iha uma fukun PN, Tersa, (14/06).
Eis Governador Timor-Timur iha tempo okupasaun Indonesia ne’e mos husu ba PM Xanana atu hare problema ne’e ho serius no hare mos membru governu sira ne’ebe mak servisu diak no la diak.
Iha fatin hanesan deputadu hosi partidu Frente Revolusionariu Timor Leste Independensia – FRETILIN, Inacio Moreira hateten, agora ukun besik hotu ona foin rekuinese katak, governu ida ne’e iha duni korupsaun.
“Agora ukun atu remata ona PM Xanana Gusmao foin mak hakfodak no rekuinese katak, governu ne’ebe nia lidera ne’e halo duni korupsaun hodi halakon osan bar-barak iha governu AMP no deste uluk ami hakilar bebeik ona maibe sira dehan ami bosok no hakilar arbiru deit agora ita hare realidade ona” dehan Inacio Moreira. Thomas Sanches
Tidak ada komentar:
Posting Komentar