Timor-Leste no São Tomé e Príncipe asina Memorandu Entendimentu

Sekretáriu Estadu Rekursu Naturál nian, Alfredo Pires, halo vizita ofisiál ba São Tomé e Príncipe husi loron 13 to’o loron 18 fulan Maiu nian hodi hasoru-malu ho Ministru Obras Públika no Rekursu Naturál rai ne’ebá nian.

Durante ninia vizita, Alfredo Pires partispa iha workshop ida ne’ebé nia aprezenta ”Esperiénsia iha Indústira Mina-rai Timor-Leste nian”. Iha okaziaun seluk fali nia hetan oportunidade hodi ko’alia ba Kuadru sira Ajénsia  Nasionál Mina-rai nian, husi zona konjunta, husi gabinete rejistu no informasaun públika no membru sira Komité Inisiativa no Transparénsia  iha Indústria Estrativa (ITIE)entre sira seluk,  Kona-ba tema hirak ne’ebé iha relasaun ho  indústria mina-rai nian.

Iha palestra públika ida ba sosiedade sivíl, nia ko’alia tema hanesan ”Jestaun kona-ba Fundu Soberanu Timor-Leste nian”, “Kuadru jurídiku-legál  no dezenvolvimentu zona konjunta Timor-Leste – Austrália” no kona-ba “Integrasaun Timor-Leste nian iha ITIE”.

Aleinde ida ne’e, Sekretáriu Estadu Rekursu Naturál no Ministru Obras Públika no Rekursu Naturál,  asina Memorandu Entendimentu ida atu hakle’an no  haluan kooperasaun entre Timor-Leste no São Tomé e Príncipe.

Memorandu ida ne’e dura tinan tolu no ko’alia kona-ba kooperasaun iha área Rekursu Naturál, liuliu iha área mina-rai no gás; formasaun kuadru São Tomé nian sira ne’ebé halo parte iha indústria mina-rai nian; asisténsia téknika no institusionál ba Ministériu Obras Públika no Ajénsia  Nasionál Mina-rai nian (ANP - STP); vizita kuadru téknika husi rai rua ne’e nian no kolaborasaun entre Komité Nasionál sira kona-ba Inisiativa Transparénsia  iha Indústria Estrativa (ITIE) Mina-rai nian.

Iha mós desizaun ida atu harii Komité Servisu nian ida ne’ebé sei tuir implementasaun husi atividade hirak ne’ebé prevee tiha ona.