Hafoin lao semana ida iha Distiritu Lautem, hau konsege hasoru malun ho belun ka kompanheiro antigu sira nebe uluk hamutuk iha resistensia liu husi frente klandestina, ami hasoru malun dada lia no kaolia ba malun konaba situasaun aktual nebe mosu iha ita nia rain. Fofoun hau tenke kuidade bainhira koalia konaba politika partidu nian, tamba belun sira agora hili dalan liu husi CPD-RDTL, nebe mos bele dehan ema save sira iha sucu. Konversa komesa to'o klaran tiha mak hau foin husu ba sira konaba lideransa sira nebe ohin loron iha Timor ho sira nia metode de aprosimasaun wanhira sira koalia ho povo ou militante sira iha base. Kompanheiro ne'e dehan ba hau nune'e, hau mak kontra no atu muturabu fali konsolidasaun partidu Fretilin nian iha Sucu Daudere tamba Mari dehan fali CPD-RDTL ne'e ilegal. Nia haktuir buat ne'e ho nervos. Komu ami hatene malun diak liu entaun hau dehan ba nia, Xanana deit mos sei hakraik an ba visita nia maluk sira iha Waibobo, nusa mak nia (Mari) ida nebe nunka hatene ema sira nebe uluk iha Ailaran, ba hateten at tan fali ema. Kala tensaun sae liu nia dehan ba hau nune'e, nia kuandu mosu fali iha ne'e mak nia sei mangame ami mak sei hateten ba nia, diak liu O (Mari) ba Mosambique deit ona, tamba hodi o (Mari) mak ami nia partidu bele hetan derota bo'ot sira nune'e.
Kala tebes duni mak ema barak mos konta konaba Mari nia atitude lideransa nebe konfrontativo. Mari hanoin situasaun no mentalidade povo ida ne'e sei hanesan mos ho povo ida iha 1975. Situasaun muda tiha ona no povo ne'e terus hamutuk ho nia lider gerilieiru sira durante 24 anos, sira hatene muito ben ba se mak sira bele fiar no ba se mak sira bele duni sai husi Timor. Belun ida nebe hau temin iha leten ne'e dehan mai hau nune'e, Ami laos CNRT no Ami mos Laos Fretilin BP7. Ami Fretilin movimentu no kaer metin prinsipiu ukun an to'o agora. Hau nia konklusaun depois de koalia ho nia no konversa kuase horas tolu nune'e, hau bele dehan katak ba sira Xanana Gusmao importante, no sei importante ba Timor Leste iha tempu ida agora no ba periodu hirak tuir mai, sira bele la vota karik maibe sira nia influensia ba povo hodi rekonhese Xanana Gusmao nudar lider bo'ot Timor nian bele hetan ona valor positivo iha neba. Sim, sira la involve partidu karik mais sira rekuinhese maun Xanana nudar sira nia Komandante Supremo no prontu atu halo tuir saida mak Xanana sei dehan ba sira. Ida ne'e nudar espresaun pesoal kompanheiro ne'e nian depois de nia mos asiste visita Xanana ba iha Waibobo.
Hein katak sira mos bele kontribui liu husi sira nia apoio moral ba situasaun hakmatek ida para nune'e, dezenvolvimentu no visaun sira nebe trasa ona iha Planu Estrategiku Dezenvolvimentu Nasional nian nebe durante maun Xanana lori la'o haleu Timor bele hetan fatin atu implementa hodi ita nia povo bele hetan moris diak no iha dignidade nudar povo ida iha nasaun ida soberano.
Obrigadu.
Asuwain Timor
Tidak ada komentar:
Posting Komentar