SEFOPE entrega sertifikadu ba Sentru Formasaun Profisionál sira

Sekretáriu Estadu ba Formasun Profisionál no Empregu, Bendito Freitas, iha loron 9 Maiu, iha salaun sorumutu SEFOPE, entrega sertifikadu ba Sentru Formasaun Profisionál hamutuk 11 ne’ebé mak rejista tuir padraun nasionál nian.
“Ne’e pasu importante ba polítika Governu nian, liu-liu atu promove formasaun profisionál orientada ne’ebé bele hatán ba dezafiu no izijénsia sira no empregu ba juventude sira. Ho rejistu ofisiál ne’ebé mak halo katak, sentru 11 ne’e, tama ona iha polítika Governu nian, atu bele adota ho sistema servisu nian, hodi sai parseiru estratéjiku ba dezenvolvimentu rekursu umanu nian,  liu-liu iha área téknika no profisional”, hateten Sekretáriu Estadu, Bendito freitas.
“Nia mós fiar katak iha futuru Sentru balun ne’ebé seidauk tama iha sistema rejistu padraun nasionál, bele hadi’a sira nia estrutura, rekursu, finanseiru no fasilidade sira. Importante liu mak sentru formasaun profisionál tenke eduka formandu sira, atu bele responde ezijénsia téknika profisionál iha merkadu traballu”, hatutan Bendito Freitas
Sentru Formasaun Profisionál ne’ebé simu tiha ona sertifikadu  mak hanesan, Sentru  Nasionál Empregu no Formasaun Profisionál (SNEFP Tibar), Sentru Formasaun Brazil-Timor-Leste (SENAI Becora), Sentru Treinamentu Informátika no Kostura (STIK Fuiluro), Sentru Paz Santa Isabel Manatutu, Sentru Treinamentu Integradu no Dezenvolvimentu (STID Baucau), East Timor Development Agency (ETDA), Sentru Treinamentu Vokasionál Juventude (STVJ Comoro), Sentru Treinamentu Vokasionál Juventude (STVJ Bairo Pite), Sentru Treinamentu Vokasionál Juventude (STVJ Camea Becora), Sentru Treinamentu Vokasionál Juventude (STVJ Manatutu), no Sentru Treinamentu Vokasionál Juventude (STVJ Gleno Ermera).