PM Xanana: “ Timor Oan Nebe Servisu Iha UNMIT, Lalika Loko An”

Josefa Parada - Tersa, 17 Maiu 2011 - SUARA TIMOR LOROSAE

DILI- Primeiru Ministru (PM) Kay Rala Xanana Gusmão hateten Timor oan nebe halao servisu hamutuk ho United Nation Mission In East Timor (UNMIT), lalika loko an no hatudu an liu. Attitude hanesan ne’e ema bele dehan kolonializmu intelektual.

“ Hau hakarak dehan ba timor ona sira nebe servisu ba UNMIT, atu laika loko an, laika hatudu demais ba ema sira, moras a’at ne’e ita bele bolu dehan kolonializmu intelektual, iha lian portugues maka aliade, ita nia konstitusaun dehan, la bele aliade ita nia soberania, ne’e katak labele fan ita nia soberania ba ema seluk,” dehan PM Xanana liu husi deskursu iha seremonia primeira Jornada Cientifica e Noite Cultural, iha Dili Convention Center, eis Merkadu Lama, Tersa (17/5).

Reasaun PM Xanana ne’e relasiona ho relatoriu husi UNMIT nebe hateten Xanana hanesan obstaklu ba demokrasia iha Timor Leste (TL), maibe atu hatene lolos buat hirak ne’e katak PM Xanana, povu maka iha direitu atu fo sasin, karik PM Xanana aliade tiha ona povu nia fiar nomos aliade tiha ona soberania nasaun.

PM Xanana hatutan, iha relatoriu UNMIT nian ne’e mos hateten katak Xanana Gusmão bainhira iha prosesu 2001-2002, preparasaun ba Independensia la involve an iha prosesu sira ne’e, hanesan involve iha prosesu partidu politiku hodi hatudu mos katak nunka tau matan ba prosesu sira ne’e.

Hatan relatoriu hirak ne’e, PM Xanana hateten UNMIT halo hanesan ne’e atu hanaruk sira nia misaun. Xefi Governu ne’e esplika, se karik iha 2008 maka nia rasik la hasai komando atu halo operasaun konjunta, nasaun ne’e karik sei iha krize nia laran to’o ohin loron.

“ Ita bele garante katak ita sei iha krise nia laran, ba unmit ida ne’e ladiak, tamba sira bele hanaruk sira nia misaun. Timor oan balun suporta UNMIT, tamba dehan sira jauda makas ekonomia povu, hau komprende katak UNMIT iha matenek barak, nasionais no internasionais, ne’e maka sira la estuda didiak hau nia resposta ba iha PN, UNMIT nia matenek la to’o atu komprende katak hau nudar PM TL, la simu politkus sira ne’e,” hateten tan PM Xanana. Josefa Parada